- Elnur, “Xəzər Lənkəran”ın ilk “altılıq”dan kənarda
qalmasını təsəvvür edirdin?
- Heç vaxt. Yatsaydım da yuxuma girməzdi ki, ikinci
“altılıq”da mübarizə aparacağıq. Həyatım boyu buna inanmazdım. Belə alındığı
üçün inanın ki, utanıram. Heç bilmirəm ki, bu vəziyyətdə özümü necə
toparlayacağam. Başqa komandada oynasaydım belə, yenə inanamazdım ki, “Xəzər Lənkəran”
ilk “altılıq”dan kənarda qalacaq.
- Səncə, “Xəzər Lənkəran”ın ilk “altılıq”da kənarda qalması
çempionluq mübarizəsinə marağı azaldıb?
- Buna siz özünüz qiymət verin də. Təsəvvür edin ki,
“Xəzər Lənkəran” ilk “altılıq”da olanda “Neftçi” ilə oyuna maraq nə qədər böyük
idi. Hər iki komanda oyuna ciddi hazırlaşırdı. Bundan başqa, mətbuatda derbi
oyununa aid maraqlı məlumatlar gedird. Bu da istər-istəməz ajiotaj yaradırdı.
Digər tərfədən bütün komandalar bura gələndə “Xəzər Lənkəran”a daha da
ciddi baxırdı. Hər halda razılaşarsınız ki, bu gün azarkeş baxımından “Xəzər Lənkəran”
camiəsi digər komandaları üstələyir. Mətbuat indi nədən yazacaq? “Qəbələ” və
“Simurq”u çıxmaq şərti ilə qalan komandalar paytaxt klublarıdır.
- İkinci “altılıq”da mübarizə aparmaq sizin üçün ağır deyil
ki?
- Nə qədər özünü oyuna kökləsən də, yenə də həvəssiz mübarizə
olacaq. Belə baxanda ikinci “altılıq” autsayderlə arada o qədər fərq var
ki, mübarizənin dəyəri də yoxdur. Şəxsən mənim üçün ikinci “altılığ”a
düşmək elə audsayder olmaq kimi bir şeydir. Buna görə, öz adımdan lənkəranlı
azarkeşlərdən üzr istəyirəm.
- Bu uğursuzluğu unutmaq üçün çıxış yolunu nədə görürsən?
- Yeganə məqsədimiz kubokdur. Başqa yolumuz yoxdur.
Uğursuzluğu unutdurmaq üçün kuboku Lənkərana gətirməliyik. Bəlkə də
ilk “altılıq”dan kənarda qalmağımız bizə bir dərs olar və kubokda finala çıxıb
bu titulu qazanmağımıza yol aça bilər. İnanıram ki, uşaqlar toparlansa, kubokda
öz sözümüzü deyə bilərik. Kişi kimi yığışıb oynamaq lazımdır. Artıq başqa şeylərə
fikir verməməliyilk. Avrokuboklara ən rahat yolumuz kubokdan keçir.
Anar XANLAROV
