Tarix
Futbolun cənub dalğası
2004-cü il Azərbaycan futbolunda böyük canlanmanın yaranması ilə yadda qaldı. İdmanın ən populyar növünə iş adamlarının marağı nəticəsində ölkənin müxtəlif bölgələrində yeni futbol klubları yarandı. Yeni yaranmış klublar ilk illərdə qarşılarına sadəcə çıxış etdikləri çempionatda möhkəmlənmək məqsədi qoysa da, Azərbaycanda bu proses ənənəvi şəkildə olmadı. Belə ki, yeni klublar dərhal böyük iddialar uğrunda mübarizəyə qoşuldu ki, bu da ölkə çempionatında gərgin mübarizəyə gətirib çıxardı.İddialı başlanğıc
Yeni yaranmış klublar arasında yer alan “Xəzər-Lənkəran” heç kimin gözləmədiyi halda ilk mövsümdəcə çempionluq arzusunu gizlətmədi və hədəfə nail olmaq yolunda böyük addımlar atdı. Artıq çempionatın ilk turlarından sonra komandanın sükanı arxasına futbolçu və məşqçi karyerası ilə adından söz etdirmiş türkiyəli çalışdırıcı Rasim Kara keçdi. Onun gəlişi ölkədə böyük səs-küyə səbəb oldu. Öz çıxışlarında Rasim Kara Azərbaycan futbolunda vəziyyətin ürəkaçan olmadığını desə də, görülən işlərin tezliklə bəhrə verəcəyini bildirirdi. Rasim Kara klub rəhbərliyinin də böyük dəstəyi ilə “Xəzər-Lənkəran”da ilk öncə təsisləşmənin özülünü qoydu. Belə ki, mövsümün ortalarına doğru artıq “Xəzər-Lənkəran” rəqiblərini doğma rayonda qəbul edir və komanda kluba məxsus bazada məskunlaşırdı. Bu arada komanda heyətinə dünya səviyyəli bir ulduz da cəlb etmişdi. Bir müddət Türkiyə millisinin, “Beşiktaş”, “Fənərbağça” kimi klubların şərəfini qorumuş Oktay Dərəlioğlu “Xəzər-Lənkəran”da da qollarını sıralayırdı. 2004/2005 mövsümünün ikinci dövrəsindən etibarən uğurlu nəticələr əldə edən “Xəzər-Lənkəran” çempionluğa doğru irəlilədi. Mövsümün sonunda “Xəzər-Lənkəran” və “Neftçi” eyni xala malik olduqlarından, əlavə matça - “Qızıl oyun”a ehtiyac yarandı. Qızıl medalların taleyinə 2005-ci il, iyun ayının 10-da Gəncə şəhər stadionunda aydınlıq gəldi. “Xəzər-Lənkəran” matça yaxşı başlayaraq, hesabda irəli çıxsa da, ikinci hissədə daha təcrübəli futbolçulardan qurulmuş “Neftçi” hesabı öz xeyrinə dəyişərək çempion tituluna yiyələndi. Lakin “Xəzər-Lənkəran” meydançanı mövsüm ərzindəki çıxışı ilə Gəncə şəhər stadionuna toplaşmış 25 mindən artıq azarkeşın alqış sədaları altında tərk etdi.2005/2006 mövsümündən öncə “Xəzər-Lənkəran” çempionluğa bir nömrəli namizəd göstərilsə də, mövsüm o qədər də uğurlu alınmadı. Məşqçi dəyişikliyi də gözlənilən nəticələri gətirmədi. Həmin mövsüm “Xəzər-Lənkəran” üçün yalnız iki məqamla yadda qaldı – komanda ölkə kubokunda yarımfinala qədər irəlilədi və çempionatın ikinci dövrəsini “Xəzər-Lənkəran” məğlubiyyətsiz başa vurdu.
Uğursuz mövsümün sonunda komanda yenə məşqçi dəyişikliyinə qərar verdi və ölkənin ən titullu çalışdırıcısı Ağasəlim Mircavadov “Xəzər-Lənkəran”ın baş məşqçisi oldu. Uğur qazanmağın yollarını bilən Mircavadov reallaşdırdığı bir neçə transferlə Lənkəran şəhərinə möhtəşəm bir il yaşatdı. Mövsümün Lənkəranda keçirilən ilk oyunu unudulmaz səhnələrə şahidlik etdi. Belə ki, çempionatın 2-ci turunda “Xəzər-Lənkəran” “Neftçi”ni qəbul etdi. “Xəzər Lənkəran Mərkəzi Stadionu”nun rəsmi açılışı ilə də yadda qalan oyun günü ölkə prezidenti cənab İlham Əliyev stadionumuzu ziyarət etdi. Komanda ilə xatirə şəkli də çəkdirən cənab İlham Əliyev simvolik olaraq, topa ilk toxunuşu etdi.
"Qızıl dubl" və Birlik Kuboku
Axşam saatlarında isə “Xəzər Lənkəran Mərkəzi Stadionu”na toplaşan 15 minlik azarkeş ordusu və Lənkəran camaatı “Xəzər-Lənkəran”ın “Neftçi” üzərində qələbəsini bayram etdi.Komanda mövsümboyu inamlı təsir bağışladı və çempionatın son turunda Qəbələdə yerli komandanı 4:0 hesabı ilə məğlub edərək qızıl medallara yiyələndi. 28 may 2007-ci ildə - Respublika günündə isə “Xəzər-Lənkəran” ölkə kubokunun finalında İmişlinin “MKT-Araz” klubunu qəbul etdi. İki əyalət klubunun mübarizə apardığı görüşdə gülən tərəf Lənkəran təmsilçisi oldu. Beləliklə, gözlənilən və arzulanan “qızıl dubl” reallaşdı və “Xəzər-Lənkəran” mövsümü ölkə çempionluğu və kuboku ilə tamamladı.
Çempionlar Liqasında Azərbaycanı təmsil etmək hüququ qazanan “Xəzər-Lənkəran” püşkün nəticələrinə görə ən çətin rəqiblə qarşılaşmalı oldu. Avropada özündən söz etdirməyi bacaran Xorvatiyanın “Dinamo” klubu avrokubokda komandanın rəqibi oldu. Bakıda keçirilən ilk oyunda Lənkəran təmsilçisi hesabı açsa da, qonaqlar bərabərliyi təmin etdilər. İkinci matçda da eyni senari yaşandı. Xorvat azarkeşlər komandalarından inamlı qələbə gözlədiyi halda, lənkəranlılar cavab matçında da hesabı açaraq bütün Zaqrebi şoka saldı. Lakin daha təcrübəli xorvatlar matçın sonlarına yaxın bərabərlik qolunu vuraraq, matçın taleyini bir qədər də uzatdılar. Yalnız əlavə vaxtda rəqibinə məğlub olan “Xəzər-Lənkəran” şanssız şəkildə avrokuboklarla vidalaşdı.
Bununla belə, “Xəzər-Lənkəran” Azərbaycanın hüdudlarında adından söz etdirməyi bacardı. Belə ki, MDB və Baltikyanı ölkə çempionlarının çıxış etdikləri “Birlik Kuboku”nda komanda Azərbaycanı layiqli təmsil etdi. Litva, Qazaxıstan və Tacikistan çempionlarının iştirak etdiyi qrupdan lider kimi çıxan “Xəzər-Lənkəran” növbəti mərhələdə Moldova çempionu “Şerif”i yarışdan kənarlaşdırdı. Dramatik matçın ardından lənkəranlılar yarımfinalda Belarus çempionu “BATE”ni də məğlub etdi. Böyük azarkeş kütləsi toplayan final matçı “Xəzər-Lənkəran”la Özbəkistan çempionu “Paxtakor” arasında keçirildi. Matçı FİFA prezidenti Yozef Blatter, UEFA prezidenti Mişel Platini, Rusiya Futbol İttifaqının prezidenti Vitaliy Mutko şərəf tribunasından izləyirdi. İlk hissədə özbəklər komandamız önündə hesabda iki dəfə irəli çıxsa da, fasiləyə komandalar 2:2 hesablı bərabərliklə yollandı. Xüsusilə Zaur Ramazanovun “Paxtakor”un qapısından keçirdiyi qol FİFA və UEFA prezidentləri tərəfindən ayaqüstə alqışlandı. İkinci taymda matça tam nəzarət edən “Xəzər-Lənkəran” nəticədə 4:3 hesablı qələbə qazanaraq, kuboku Azərbaycana gətirdi. Heydər Əliyev adına Beynəlxalq Hava Limanında komanda əsl qəhrəmanlar kimi qarşılandı.
Ölkə rəhbərliyi də bu hadisəyə biganə yanaşmadı. Azərbaycan Respublikasının prezidenti cənab İlham Əliyev əlamətdar qələbə münasibəti ilə “Xəzər-Lənkəran”ın qalib heyətini prezident iqamətgahında qəbul etdi. Klub üzvlərini təbrik edən ölkə prezidenti komandaya gələcək yarışlarda daha böyük uğurlar arzuladı. Cənab İlham Əliyev eyni zamanda onu da qeyd etdi ki, “Xəzər-Lənkəran”ın qələbəsi Azərbaycanın bölgələrində də futbolun inkişaf etdiyini göstərir. Klubun fəxri prezidenti Mübariz Mənsimov öz çıxışında bildirdi ki, ölkəmizin adını uca tutmaq üçün bundan sonra daha böyük qüvvə ilə çalışacaqlar.
İkinci kubok
2007/2008-ci illər mövsümündə “Xəzər-Lənkəran” hesabına daha bir titul yazdı. Əsas diqqətini MDB və Baltikyanı ölkələrin çempionalrın “Birlik Kuboku”na yönəldən komandamız üç cəbhədə (ölkə çempionatı, ölkə kuboku və “Birlik Kuboku”) mübarizə aparmağa çətinlik çəkdi. Çempionluq şansını erkən itirən futbolçularımız bunun əvəzini kubok uğrunda yarışda çıxdı. Bakıda T.Bəhramov adına Respublika stadionunda keçirilən final görüşündə “Xəzər Lənkəran” paytaxtın “İnter” komandası ilə qarşılaşdı. Dramatik süjet almış oyunun sonunda sevinən tərəf “ağ-yaşıl” geyimli futbolçular oldu. Komandamız oyun boyu üstünlüyə sahib olsa da, matçın 90 dəqiqəsi qolsuz başa çatdı. Əlavə vaxtda isə zədə üzündən mövsümün böyük hissəsini, o cümlədən “Birlik kuboku”nu boşa verən Junior Osvaldo səhnəyə çıxdı. Əlavə vaxtın ikinci hissəsinin əvvəlində cərimə zərbəsini mükəmməl yerinə yetirən braziliyalı yarımmüdafiəçi tribunalarda böyük çoxluq təşkil edən lənkəranlı fanatların çılğınlığını son həddə çatdırdı. Son dəqiqələrdə “İnter”in oyunu xilas etmək üçün ciddi səy göstərəcəyi düşünülsə də, futbolçularımız daha güclü olduğunu ikinci qolu vurmaqla sübuta yetirdilər. Bu dəfə də rəqibi məyus edən matçın qəhrəmanı Junior oldu. Maraqlıdır ki, finaldan cəmi bir neçə gün öncə “bankirlər” tarixlərində ilk dəfə Azərbaycan çempionu titulunu qazanmağa müvəffəq olmuşdular.Yeni mövsümə komandamız yeni məşqçiylə başladı. Əslində Ağasəlim Mircavadov hələ bir müddət də komandanı çalışdırdı. Lakin UEFA Kubokunda Polşa “Lex”inə qarşı oyunlarda (0:1, 1:4) uğursuzluq yaşayan təcrübəli mütəxəssisin yolu komandayla ayrıldı. “Xəzər Lənkəran”a iki ildə dörd titul qazandıran məşqçinin fəaliyyətini uğursuz adlandırmaq olmazdı. Sadəcə olaraq klub rəhbərliyi bir daha qitə kuboklarında uğura ehtiyac duyduğunu bariz şəkildə nümayiş etdirdi və beynəlxalq arenada nəticə qazanmaq üçün islahata ehtiyac duydu.
Titulsuz iki mövsüm
Yeni ölkə birinciliyinin startına qısa zaman qalmış baş məşqçi vəzifəsi klubun qurulması və peşəkarlaşmasında ciddi xidmətləri olan Rasim Karanı geri qayıtdı. Lakin təəssüf ki, türk çalışdırıcı uğurlu startın davamını gətirə bilmədi. Doğma stadionda nadir hallarda uduzan komandamız ardıcıl iki “ev” məğlubiyyətinə məruz qalarkən azarkeşlərimiz etiraz səslərini ucaltdılar. “Qarabağ”la (1:3) oyundan sonra keçirilən mətbuat-konfransında Rasim kara istefa qərarını açıqladı.Məcburi məşqçi dəyişikliyi yaxşı heç nə vəd etmirdi. Çoxları anlayırdı ki, mövsümün gedişində məşqçi dəyişmək arzulanan bir proses deyil. Amma qatar artıq getmiş, Kara vəzifəsindən ayrılmışdı. İkinci dövrəyə hazırlığı boşa verməmək üçün təcili qaydada mahir penalti ustası, Azərbaycanın yetişdirdiyi ən usta futbolçulardan biri İqor Ponomaryov “Xəzər Lənkəran”ın baş məşqçisi kimi təqdim olundu. Seul Olimpiadasının qalibi ilk dövrədən sonra liderdən beş xal geri qalan “Xəzər Lənkəran”ı çempionluğa daşıyacağına söz verməyə cəsarət tapmışdı. Ən pis halda azarkeşlərimizi ardıcıl üçüncü dəfə ölkə kubokuyla və ya avrokuboklara vəsiqə qazanmaqla sevindirməyə boyun olmuş İqor Ponomaryov planlarını həyata keçirə bilmədi. Ölkə kuboku uğrunda turnirlə 1/4 final mərhələsində vidalaşan “Xəzər Lənkəran” çempionatda xəyal qırıqlığı yaşadı. Öncə “qızıl”, daha sonra sadəcə avrokuboklara vəsiqə ümidində olan komandamız öz meydanında sensasiyalı şəkildə heç vaxt uduzmadığı “Qəbələ”, ardından Ağdamın Quzanlı qəsəbəsində “Qarabağ” qarşısında aciz qaldı. Sonuncu turda “Simurq”la oyun formal xarakter daşıyırdı və hətta 3:1 hesablı qələbəylə qapını möhkəm çırpan “Xəzər”imiz qitə səhnəsinə çıxmaq imkanını itirdi... Ay yarım sonra uzun götür-qoydan sonra İqor Ponomaryov da istefaya göndərildi. Klub rəhbərliyi son bir il ərzində üçüncü dəfə məşqçi axtarışına çıxdı.
Növbəti mövsümü "Xəzər Lənkəran" yenə də keçmiş məşqçinin dəvəti ilə başladı. Bu dəfə komandanın sükanı arxasına Ağasəlim Mircavadov gətirildi. Mövsümün gedişatı ümidverci olsa da, sonda əldə oluna nəticə o qədər də uğurlu olmadı. Çempionatda son həftəyədək çempionluğa əsas namizəd olmasına baxmayaraq, ardıcıl xal itkiləri və nəhayət son turda Lənkəranda məğlubiyyət komandanı dördüncü pilləyə endirdi. Bir illik fasilədən sonra ölkə kubokunun finalına çıxan "Xəzər Lənkəran" burada da qalib gələ bilmədi. Qarşıda isə Avropa Liqasının 1-ci təsnifat mərhələsi var idi. Burada Moldivanın "Olimpiya" klubu ilə üzləşən komandamız səfərdə qolsuz heç-heçə, evdə isə 1:1 oynamaqla mübarizəni dayandırdı.
Rednik dövrü
Bütün bunların nəticəsində rəhbərlik tərəfindən Ağasəlim Mircavadovla yolları ayırmaq qərarına gəlindi. Beləliklə, 2010/2011 mövsümünün başlanmasına az müddət qalmış "Xəzər Lənkəran"ın sükanı arxasına rumıniyalı mütəxəssis Mirça Rednik gətirildi. Hazırlıq müddətinin az olmasına, Azərbaycan bələd olmamasına baxmayaraq Rednik qısa zamanda komandasını qurdu və ilk turlardan başlayaraq çempionluğa oynamağa başladı.Çətinliklər hiss olunsa da, məşqçinin işi də göz qabağında idi. Qış trasnfer pəncərəsində bir sıra futbolçuları da komandaya gətirən mütəxəssis mövsüm sonuna artıq daha baxımlı futbol nümayiş etdirən heyət qura bildi. Nəticədə "Xəzər Lənkəran" çempionata gümüş medallarla yekun vurdu. Mövsümün ən uğurlu nailiyyəti isə komandamızın tarixində üçüncü dəfə Azərbaycan Kubokunu qazanması oldu.
Növbəti avrokubok kampaniyasına "Xəzər Lənkəran" UEFA Avropa Liqasının 2-ci təsnifat mərhələsindən başladı. Burada rəqib İsrailin Makkabi Tel Əviv komandası oldu. İlk oyunda səfər 3:1 hesabı ilə məğlub olan komandamız, cavab oyununda qolsuz bərabərliyə qaldı və turniri tərk etməli oldu. İsrail komandası isə təsnifat raundlarında sona qədər irəliləyərək qrup mərhələsinə yüksəldi.
2011/12 mövsümü “Xəzər Lənkəran” üçün uğurlu başladı. Komanda ardıcıl 12 həftə turnir cədvəlinin birinci pilləsində qərarlaşsa da, mövsümün yaxşı başlanğıcının ardından uğursuzluq gəldi. “Neftçi” ilə oyunda böyük hesabla məğlub olan komanda bundan sonra çempionatda ardıcıl üç oyunda qələbə qazana bilmədi. Nəticədə, yeddi xal fərqi ilə lider olan komanda bir neçə turdan sonra 3-cü yerdə qərarlaşdı. “İnter”lə oyunda mövsümün ilk ev məğlubiyyətini aldıqdan sonra klub rəhbərliyi və baş məşqçi Rednik birlikdə iclas keçirdi və hər iki tərəf qarşılıqli şəkildə yollarını ayırmaq qərarına gəldi.
2011-ci ilin dekabr ayında komandaya yeni baş məşqçi təyin olundu. O, mövsümün əvvəlində komandaya gələn və aşağı yaş qrupları üzrə kordinator vəzifəsində çalışan Turkiyəli mütəxəssis Cüneyt Biçər idi. Lakin onun dövrü çox davam etmədi. Komandanın uğursuz çıxışı Cüneyt Biçərin gedişini daha da sürətləndirdi. Nəticədə, üç aylıq əməkdaşləqdan sonra "Xəzər Lənkəran" Futbol Klubu Cüneyt Biçərlə yollarını ayırdı və məşhur mütəxəssis Yunis Hüseynovla müqavilə imzaladı.
Avroliqada mərhələ adladıq
Yunis Hüseynov 2012-ci ilin may ayında komandaya gələrək öz bacarığını göstərdi və nəticədə komandamız 2011/12 mövsümünü gümüş medalla tamamladı."Xəzər Lənkəran" Yunis Hüseynovun rəhbərliyi ilə tarixində ilk dəfə Avroliqada mərhələ adladı və bu Hüseynovun klubumuzdakı ən böyük uğuru oldu. Komandamız birinci təsnifat mərhələsində Estoniyanın "Nomme Kalyu" komandası ilə qarşılaşdı. Bu komandayla ev oyunu bərabərliklə bitsə də, komandamız səfərdə 0:2 hesabı ilə qalib gəldi. İkinci təsnifat mərhələsində "Xəzər Lənkəran" 4 il əvvəl qarşılaşdığı Polşanın "Lex Poznan" komandasıyla görüşdü. təəssüf ki, komandamız 4 il əvvəl olduğu kimi Polşa "Lex"ini məğlub edə bilmədi və Avroliqadakı çıxışını dayandırdı.
Azərbaycan Premyer Liqasının 2012/13 mövsümünün ilk dövrəsi komandamız üçün uğursuz başladı. Bunun nəticəsində klub və Yunis Hüseynov qarşılıqlı şəkildə ımıkdaşlığı dayandırmağı qərara aldı. "Barcelona" Football Klubundan gələn ispaniyalı gənc məşqçi Karles Martorell Bakes onu əvəz eledi.
