Con Toşakı komandaya baş məşqçi gətirən "Xəzər Lənkəran”, təcrübəli mütəxəssisə əla futbolçu ehtiyatı da vermək fikrindədir.
Gələn il 10 yaşını qeyd edəcək cənub klubunun prezidenti
Mübariz Mənsimov, bunun üçün pul kisəsinin ağzını açıb. Yay transfer dövründə
komandaya gətirilməsi gözlənilən futbolçuların adları bunu deməyə əsas verir.
"Xəzər Lənkəran”ın transfer siyahısında dünyaca məşhur
futbolçular var. Qolkiper problemini "Trabzonspor”un çərçivə
qoruyucusu Onur Kıvrakla aradan qaldırmaq niyyətində
olan "ağ-yaşıllar”, müdafiəyə Çempionlar Liqasının 1/4
finalçısı "Qalatasaray”ın mərkəz müdafiəçiləri Tomas Uyfaluşi və Gökhan
Zanı gətirmək istəyir. Deyilənə görə, Terimin komandasında əsas heyətə düşə
bilməyən bu futbolçularla danışıqlar aparılıb və bötün detallarda razılıq əldə
olunub.
Yarımmüdafiə xəttinə məşhur argentinalılar Fernando
Kavenaqi və Xuan Ramon Rikelme, üstəlik, standart zərbələrin mahir
ifaçısı sayılan braziliyalı Juninyo Pernambukano da lənkəranlıların dəvətini
qəbul edib.
Hücum xətti isə hazırda Moskva "Dinamo”sunun şərəfini
qoruyan alman Kevin Kuranyinin hesabına gücləndiriləcək. ("Futbol+” qəzeti)
