Bu gün Topaz Premyer Liqasının 26-cı turu çərçivəsində komandamız səfərdə Tovuzun “Turan” klubunun qonağı oldu. “Xəzər Lənkəran” rəqibin qarşısına aşağıdakı start heyəti ilə çıxmışdı: Orxan Sadıqlı, Vanderson Skarduelli, Marin Orsuliç, Radomir Todorov, Adrian Skarlatake, Elnur Allahverdiyev (k), Elnur Abdullayev, Uğur Pamuk, Adrian Pit, Roberto Alviz, Dimitrios Sialmas.
Hakimin start fitindən iki dəqiqə sonra nominal meydan
sahibləri hesabı açmağa yaxın olsa da Orxan Sadıqlı yaxın məsafədən endirilən zərbəni
dəf etməyi bacardı. Rəqibin bu epizoduna komandamız Uğur Pamukun zərbəsi ilə
cavab versə də bu dəfə Kamal Bayramov üzərinə gələn topu asanlıqla ram etməyi
bacardı. İlk 15 dəqiqənin tamamında meydanda təşəbbüsü ələ almaq uğrunda
mübarizə gedirdi ki, tovuzlular bu mənada komandamızdan geri qalsa belə hesabı
açmağa nail oldular. Müdafiə xəttindəki kobud səhvdən Antonio Rukavina maksimum
istifadə etdi. Qoldan dərhal sonra futbolçularımız azacıq dəqiq oynasa idilər bərabərlik
qolunu vura bilərdilər. Lakin Uğurun sağ cinahdan uzun reydi sonrası paralel
ötürməsinə Pit yetişə bilmədi. Ardınca rumın yarımmüdafiəçimiz əlverişli mövqedən
topu düz Bayramovun üzərinə vurdu. Con Bencamin Toşak hücumlarımızın kəsərini
artırmaq üçün 30-cu dəqiqədə Todorovun əvəzinə meydana Gökhan Güləci buraxaraq
“Xəzər Lənkəran”ın iki hücumçu ilə mübarizə aparmasına şərait yaratdı. Məhz bu
dəyişiklik öz bəhrəsini verdi. Təzyiqi artıran komandamız 39-cu dəqiqədə Pitlə
qola yaxın olsa da Bayramovun ideal seyvi qola mane oldu. Bununla belə
komandamız hesabı bərabərləşdirməyi bacardı. Cərimə zərbəsindən havalandırılan
topu Elnur Abdullayev son anda qapıya göndərib qolu aktivinə yazdırdı. İlk hissə
1:1- lik bərabərliklə başa çatdı.
İkinci hissəyə elə də fəal başlamayan “ Xəzər Lənkəran”ın
heyətində sonrakı dəqiqələrdə Uğur Pamuku Kazım Kazımlı, Sialması isə Tounkara əvəzlədi.
66-cı dəqiqədə Sadio Tounkaraya qarşı kobudluğa görə təyin olunan penaltini
Alviz dəqiq zərbə ilə tamamlayıb komandamızı önə keçirdi. Lakin üç dəqiqə sonra
tovuzlu futbolçular hesabı bərabərləşdirib yekun nəticəni müəyyənləşdirdilər -
2:2
