- “Turan”la oyun barədə nə deyərdin? Səncə, həmin
qarşılaşmada “Xəzər Lənkəran” necə təsir bağışladı?
- Əlbəttə ki, həmin qarşılaşmadakı çıxışımızdan xoşum gəlmədi.
Çünki çox pis oyun nümayiş etdirdik. Biz həmin oyunda qalib gəlməli idik. Hesab
edirəm ki, yaxşı oynamadıq. Həmin matçda pis oynadığımızın fərqindəyik.
Çalışacağıq ki, kubok oyununda yaxşı çıxış edək.
- “Xəzər Lənkəran” “Turan”, “Kəpəz” kimi komandalara qarşı zəif
təsir bağışlayır. Səncə, bunun səbəbi nədir?
- Nə deyə bilərəm ki. Qalib gələ bilmədik. Məncə, həmin
oyunlara yaxşı köklənə bilmirik. Onu da deyim ki, biz ilk “altılığ”a düşə bilmədik
və çox məyus olduq. Məncə, bu amil də oyunlarımıza mənfi təsir edir və özümüzü
yaxşı cəhətdən göstərə bilmirik. Amma kubokda şansımız davam edir və növbəti
oyunumuz da “Bakı”ya qarşıdı. Hesab edirəm ki, finala çıxmalıyıq.
- İkinci “altılıq”da 4 oyun keçirmisiniz və cəmi bir qələbəniz
var. Iki heç-heçə, bir məğlubiyyət və bir qələbə. Səncə, komanda ilk “altılığ”a
düşsəydi, nəsə edə biləcəkdi?
- Bilirsiniz bunlar fəqrli şeylərdir. Əgər ilk “altılığ”a
düşsəydik və “Neftçi”, “Qarabağ” kimi güclü rəqiblərə qarşı oynasaydıq, daha fərqli
oyun göstərərdik. Elə güclü rəqiblərlə oyuna başqa cür köklənmə olur və daha fərqli,
daha inamlı oyun nümayiş etdirirsiniz. Hazırda ikinci “altılığ”da olduğumuza
görə çox məyusuq. İkinci “altılıq”da olanda da Turan”, “Kəpəz” kimi komandalara
qarşı oynayırıq və yaxşı köklənə bilmirik. Məncə, bu normal haldır. Amma ilk
“altılığ”da olub, misal üçün, “Neftçi”yə qarşı çıxış etsəydik, oyunumuz
onlardan heç də fərqlənməzdi və daha güclü təsir bağışlayardıq. Məncə, hazırda
“Neftçi” ilə “Xəzər Lənkəran” arasında elə də böyük fərq yoxdur. İkisi də eyni
gücdədi. Bayaq da dediyim kimi hazırkı problemimiz oyuna köklənməkdədir. Biz
heç də zəif deyilik. Komandamızda güclü oyunçular var. Fikrimcə, çempionluğa
oynamaqla, birinci diviziona düşməmək üçün oynamaq arasında böyük fərq var.
Bilirsiniz çempionluq üçün oynayanda daha inamlı, daha dişli çıxış göstərirsən.
Ona görə də Premyer Liqanın bu yerində olmaq istər-istəməz bizə təsir edir,
yaxşı əhval-ruhiyyə ilə meydana çıxa bilmirik. Məncə, bu amillər bizə mənfi təsir
göstərir. Doğrusunu demək gərəkirsə, bizim üçün çempionat bitmişdir. Bundan
sonra nə edə bilərik. Əsas fikrimizi kuboka yönəltmişik.
- Hazırda “Xəzər Lənkəran”ı dünyaca məşhur mütəxəsis
çalışdırır. Səncə, bunun kluba nə kimi xeyri dəyər? Toşak Bakesdən fərqli
olaraq komandada nəyi dəyişdi?
- Toşak həqiqətən də çox təcrübəli və güclü mütəxəsisdir. Mən
əminəm ki, onun bizə çox köməyi dəyəcək, amma bunu tezliklə gözləmək yalnış
olardı. Gələn hər yeni məşqçinin, futbolçunun vaxta ehtiyacı olur. Baş məşqçimiz
nəyi necə edəcəyini daha yaxşı bilir. Hələ 2-3 aya ehtiyacımız var. Fikrimcə,
komandanın yeni oyunçulara da ehtiyacı var. Toşakın komandaya çox faydalı
olacağını düşünürəm. Bizim onun, onun da bizim köməyimizə ehtiyacı var. Belə olduqda
komandanı daha yaxşı toparlaya biləcəyik.
- Hazırda “Xəzər Lənkəran”ın avrokuboklara getmək üçün yeganə
yolu kuboku qazanmaqdır. Kubokda növbəti oyununuz da “Bakı”ya qarşıdır. Həmin
qarşılaşma barədə nə deyə bilərsən?
- Fikrimcə bu oyun bizim üçün çox vacibdir. Finala çıxıb kuboku almaq istəyirik.
Ona görə də “Bakı”ya qalib gəlmək üçün əlimizdən gələni edəcəyik və hər bir
imkanı dəyərləndirməyə çalışacağıq.
- Çempionatdakı nəticələrinizə, çıxışlarınıza görə azarkeşləriniz
sizdən inciyib. Hazırda onlar sizdən Azərbaycan Kubokunu qazanmağınızı gözləyir.
Səncə, belə bir vəziyyətdə kuboku qazana bilməsəniz, bunu faciə adlandırmaq
olar?
- Bəli, fikrimcə, bu faciə olar. Çünki bu mövsüm çempionatda
heç nə edə bilmədik. Fikrinizlə razıyam. Finala çıxıb kuboku qazana bilməsək,
bu çox pis olar.
- Komandada müdafiə xəttində sanki problemlər var. Qol vurur, amma çox da qol
buraxırsınız. Sən necə düşünürsən?
- Məncə
problem tək müdafiədə deyil, hər yerdədir. Çünki yaxşı nəticə qazana bilmirik.
Həm də ki, biz ancaq müdafiə oyunu oynamırıq ki. Əgər nəticə müsbət deyilsə,
deməli, problem hər yerdədir. Fikrimcə, komanda ümumilikdə yaxşı oyun göstərə
bilmir. Ona görə də, çox qol buraxırıq. Deməzdim ki, yeganə problem müdafiədədir.
- Zədən var
idi. Bildiyimizə görə artıq sağalırsan. Zədən tam bərpa olunub?
- Elə də
ciddi problemim yoxdu. Əvvəl bir az zədəm vardı, amma indi tam sağalmışam.
Elmar VƏLİYEV
