Con Toşak Foqtsun cavabını verdi
Uelsli mütəxəssis yığmada iki futbolçunu bəyənib.
Millinin dünya çempionatının seçmə mərhələsi çərçivəsində
keçirdiyi rəsmi oyunlarla bağlı premyer liqamızda verilən fasilə ən çox
“Xəzər Lənkəran”ın işinə yaradı. Məşhur mütəxəssis Con Toşak komandanı təhvil
aldıqdan sonra yaranmış fasilə zamanı keçirdiyi məşqlərdə futbolçuları
tanımaq imkanından maksimum istifadə edir. Daha fərqli və maraqlı məşqlərdə
futbolçuların əzmkarlıqla çalışması və Toşakın gözünə girmək istəyi açıq-aşkar
hiss olunur. Daha bir maraqlı məqam elə Toşakın özü ilə bağlıdır. Belə ki, klub
rəhbərliyi mütəxəssis üçün ayrıca avtomobil və sürücü ayırsa da uelsli
çalışdırıcı rəhbərlikdən velosiped istəyib. Bu istəyi dərhal yerini yetirilən
çalışdırıcı artıq üç gündür ki, məşqlərə qaldığı “Palmalife” otelindən bazaya qədər
olan 2 km yolu velosipedlə gedib gəlir. Günortalar isə Toşak bazadan ayrı
inzibati binada onun üçün ayrılan otaqdan istifadə edir. Maraqlıdır ki,
dünən gündüz məşqi nəzərdə tutulmasa da bəzi legioner futbolçular fitnes salonda
fərdi hazırlıqla məşğul idilər. “Xəzər Lənkəran”ın ən tənbəl futbolçusu
Dimitrios Sialmas Toşak gələndən bəri gecə və gündüz bilmədən fərdi məşqlərə
vaxt ayırırsa, ilk gün Toşakdan xəbərdarlıq alan Radomir Todorov da onunla birgə
salonda fərdi qaydada müxtəlif trenajorlarda hazırlıq keçirdi. Azərbaycan
yığmasının Lüksemburqla oyununu izləyən Toşak millimizin heyətində iki
futbolçunu bəyənib. Bu futbolçular isə eks “Xəzər Lənkəran”lılar Ruslan Abışov
və Kamran Ağayevdir. Uelsli mütəxəssis hər iki futbolçunun göstərdiyi oyundan
razı qalıb. Matç sonrası Berti Foqtsun azərbaycanlı futbolçuların haqqında
dediyi fikirlərlə tanış olan Toşak Foqtsun düşüncəsindən razı qalmayaraq
maraqlı ifadələr işlədib:
-“Mən, Foqtsun dedikləri ilə razı deyiləm. Əgər azərbaycanlı
futbolçular az çalışırsa, onlara texnika öyrətmək olmursa bəs biz bura niyə gəlmişik?
Bu gün Toşakı, illər öncə isə Berti Foqtsu ona görə Azərbaycana dəvət ediblər
ki, bu problemləri həll edək. Məgər hansı isə yerli mütəxəssisi Azərbaycandan
Almaniyaya, yaxud Uelsə işləməyə dəvət ediblərmi? Xeyr! Demək bizə inanıb, bizdən
kömək istəyiblər ki, bu ölkənin futbolunu inkişaf etdirək, bilmədiklərini öyrədək.”
Martın 30-da öz meydanında AZALı qəbul edəcək “Xəzər Lənkəran”
Toşakla ilk sınağına çıxacaq. Klub rəhbərliyi fan-klublarla birgə aparılan iş
sayəsində “ Fırtınalar meydanı”nı doldurmaq fikrindədir. Elə matç saatının 18-ə
keçirilməsi də buna xidmət edir. Belə ki, son vaxtlar cənublu azarkeşlər
matçların erkən saatlara salınmasına kütləvi etiraz edərək işdən
çıxa bilmədikləri üçün oyuna gələ bilmədiklərini qeyd edirdilər.
Hüseyn Cəbrayıloğlu.
MƏNBƏ: “Futbol+” qəzeti
