Son turda səfərdə "Qəbələ"yə uduzan "Xəzər Lənkəran"
ilk "altılıq" şanslarını xeyli azaltdı. Artıq cənubluların 6 ən güclü
komanda arasına vəsiqə qazanması özündən deyil, "Bakı" - "Rəvan"
matçının nəticəsindən asılıdı.
Ümumiyyətlə, komandanın cari mövsümdə uğursuz çıxışı və
"altılıq"dan kənarda qalmaq təhlükəsi klub rəhbərliyini ciddi
addımlar atmağa vadar edib. Sportal.az-ın əldə etdiyi xəbərə görə, "Xəzər
Lənkəran"ın prezidenti Mais Mənsimov komandanı bu vəziyyətdən çıxarmağı
düşünür. Bu səbəbdən də klubun idman direktoru vəzifəsinə beynəlxalq dərəcəli
keçmiş hakim Babək Quliyev təyin olunub.
Quliyev bundan sonra cənubluların həm əsas komandası, həm də
uşaq futboluna cavabdeh olacaq. Ona çempionat itirilsə də, kuboku Lənkərana gətirmək
barəsində tapşırıq verilib.
Babək Quliyev futbol həyatına 1983-cü ildə futbolçu olaraq
başlayıb. 2001-ci ildən etibarən hakimlik fəaliyyətinə start verən Quliyev
2002-ci ildən peşəkar karyerasına FİFA referisi olaraq davam edib. 2009-cu ilə
qədər Azərbaycanı beynəlxalq arenalarda təmsil edən referi 2009-cu ildə
hakimlikdən kənarlaşdırılıb. Bununla belə, Babək Quliyev futboldan
uzaqlaşmayıb. O, hazırda bir sıra media orqanlarında futbol eksperti olaraq
hakimliyin səviyyəsini şərh edir.
